സ്വർഗ്ഗവാതിൽ

ഇതാ സ്വർഗ്ഗവാതിൽ മലർക്കെ തുറക്കപ്പെട്ടിരിക്കുന്നു 
എന്ന് കരുതി ഇന്നലെ വരെ ഞാൻ 
സ്വർഗത്തിൽ കടന്നിട്ടില്ലെന്നല്ല ; കടന്നിട്ടുണ്ട് 
വിലക്കുകൾ ഉണ്ടെന്നു കരുതി 
ഭ്രമരങ്ങൾ പൂക്കൾ ഒഴിവാക്കാറുണ്ടോ !
ഞാനുമങ്ങനെ 
വർഷങ്ങൾക്ക് മുൻപാണ് , ഞാൻ അവനോടു പറഞ്ഞു 
ഡാ , നമ്മൾക്കൊരുമിച്ചു ജീവിക്കാം 
അവൻ മൗനമായി നിന്നതേയുള്ളൂ 
ഞാൻ പറഞ്ഞു : നീയെന്താ മിണ്ടാത്തത് 
അവൻ പറഞ്ഞു : ആരും സമ്മതിക്കില്ല 
ആരുടേയും സമ്മതം നമ്മൾക്ക് വേണ്ട 
അമേരിക്കയിലും യൂറോപ്പിലും ആളുകൾ അങ്ങനെ 
അതവിടെയല്ലേ 
അതേ , അതവിടെയാണ് 
അത് വളരെ ദൂരെയാണ് 
ഇന്ന് തുറക്കപ്പെട്ടിരിക്കുന്ന ഈ സ്വർഗ്ഗവാതിൽ 
അന്ന് തുറക്കപ്പെട്ടിരുന്നെങ്കിൽ 
ഞങ്ങളന്ന് ഒരുമിച്ചുജീവിക്കാൻ തയാറായേനെ 
വിവാഹം അനുവദിക്കപ്പെട്ടിരുന്നെങ്കിൽ 
ഇപ്പോഴും ആ സ്വപ്‍നം അകലെയാണ് 
ഞങ്ങൾ വിവാഹിതരായേനേ 
ഞങ്ങൾക്കിടയിലിപ്പോൾ മഞ്ഞുറഞ്ഞിരിക്കുന്നു 
അവനെവിടെയാണെന്ന് അറിയായ്കയല്ല 
അകന്നുപോയ ബന്ധങ്ങൾ വിളക്കിച്ചേർക്കാനാവുകയില്ല