നീയെന്നെ മറന്നാൽ

If You Forget Me - Poem by Pablo Neruda

നീയെന്നെ മറന്നാൽ 

നീയറിയണം ഒരു കാര്യം 

അത് നീയറിയണം 

തെളിമയാർന്ന നീലാകാശത്ത് 

നിൽക്കുന്ന പൂർണ്ണ ചന്ദ്രനെ കാണുമ്പോൾ 

ശരത്കാലത്ത് വൃക്ഷങ്ങളുടെ 

ചുവന്ന ഇലകൾ കാണുമ്പോൾ 

തണുപ്പ് കാലത്ത് 

ചൂട് കാഞ്ഞിരിക്കുമ്പോൾ  

ഉണങ്ങിയ മരക്കമ്പുകൾ 

തീയിലേക്കിടുമ്പോൾ 

ഒക്കെയും എൻറെ മനസ് 

നിന്നിലേക്ക്‌ സഞ്ചരിക്കുന്നു 

ഓരോ ഗന്ധവും ഓരോ പ്രകാശവും 

അങ്ങനെയോരോന്നും 

എന്നെ നിന്നിലേക്കാവാഹിക്കുന്ന 

ശക്തിയെന്നത് പോൽ


നിനക്കെന്നോടുള്ള പ്രണയം അവസാനിക്കുന്നിടത്ത് 

എനിക്ക് നിന്നോടുള്ള പ്രണയവും അവസാനിക്കും 

നീയെന്നെ മറന്നു തുടങ്ങുന്നിടത്ത് 

ഞാൻ നിന്നെയും മറന്നു കഴിഞ്ഞിരിക്കും 

ഇതെൻറെ ഭ്രാന്താണെന്ന് നീ കരുതുകയും 

എൻറെ വേരുകളാഴ്ന്ന തീരങ്ങളിൽ 

നീയെന്നെ ഉപേക്ഷിക്കാൻ തീരുമാനിക്കുകയും 

ചെയ്യുന്ന ആ ദിവസം 

ആ നിമിഷം 

ഞാനെൻറെ ചിറകുകൾ വീശുകയും 

എൻറെ വേരുകളുമായി 

മറ്റൊരു തീരം തേടുകയും ചെയ്യും 

എന്നാൽ 

ഓരോ ദിവസവും 

ഓരോ മണിക്കൂറും 

മാധുര്യത്തിൻറെ  മുന്തിരിച്ചാറുമായി 

നീയെന്നെത്തന്നെ നിനച്ചിരിക്കുന്നു എങ്കിൽ

ഓരോ ദിവസവും നിൻറെ അധര പുടങ്ങളിൽ 

എനിക്കായി ഒരു പുഷ്പം വിടരുന്നെങ്കിൽ 

എൻറെതുമാത്രമായവളെ 

എൻറെ പ്രണയസാഫല്ല്യമേ 

എന്നിലെ പ്രനായാഗ്നി വീണ്ടും വീണ്ടും 

ജ്വലിച്ചുകൊണ്ടേയിരിക്കും 

എന്നിലത് അണയുകയില്ല 

ഞാൻ നിന്നെ മറക്കുകയുമില്ല

നിൻറെ പ്രണയാഗ്നിയിൽ നിന്നാണ് 

എന്നിലെ പ്രണയം ഊർജം നേടുന്നത് 

നീ എന്നെ പ്രണയിക്കുന്ന കാലത്തോളം 

ഞാൻ നിൻറെ കരവലയത്തിൽ തന്നെയാവും     

പാബ്ലോ നെരൂദ 

Pablo Neruda