സവാള

വിശപ്പും കാമവുമാണ് മനുഷ്യൻ 
എന്ന് പറഞ്ഞത് ഞാനല്ല 
ഷോപ്പ്നർ ആണ് 
പണ്ടെന്നോ ജീവിച്ചിരുന്ന 
പണ്ടെന്നോ മരിച്ചു പോയ 
ഒരു ജെർമ്മൻകാരൻ 



ഇന്നിപ്പോൾ വലിയൊരു തമാശ 
നമ്മുടെ നിയമസഭയിൽ നടക്കുന്നു 
രണ്ടു ദിവസം പട്ടിണി കിടന്നപ്പോഴേക്കും 
ഒരു ജനപ്രതിനിധി ആശുപത്രിയിലായത്രെ !
നമ്മളൊക്കെ എത്ര ദിവസം പട്ടിണി കിടന്നിരിക്കുന്നു 
നമ്മളെയാരെയും ആരും ആശുപത്രിയിലാക്കിയില്ല 
ഈ രാഷ്ട്രീയക്കാരുടെ ഓരോ തമാശകളേ !



എന്താ ഇപ്പൊ പട്ടിണി കിടക്കാനും മാത്രം 
സംഭവിച്ചത് ?
സ്വാശ്രയ കൊളേജിൽ പഠിക്കുന്ന 
മാർക്കില്ലാത്ത , പണം മാത്രമുള്ള 
കൊച്ചന്മാർക്കും കൊച്ചിമാർക്കും 
കുറച്ചു കൂടുതൽ പണം കൊടുക്കണമത്രേ !



അതിനെന്താ ? അവരുടെ കയ്യിൽ 
പണം ഏറെയുണ്ടല്ലോ 
സമരം അവരല്ലല്ലോ ചെയ്യുന്നത് ?
രാഷ്ട്രീയക്കാരല്ലേ ?
രാഷ്ട്രീയക്കാർക്ക് എല്ലാം ഫ്രീയല്ലേ ?
അവരുടെ മക്കളും മാർക്കില്ലെങ്കിലും 
സ്വാശ്രയത്തിൽ പഠിക്കുന്നു 
ഫീസ് കൊടുത്തല്ല ; കൊടുക്കാതെ 
പിന്നെന്താ , ഇവന്മാർക്ക് ഇത്ര ഏനക്കേട് ?



ആദർശം പരിശുദ്ധം ആൻറണിയല്ലേ 
സ്വാശ്രയം തുടങ്ങി വെച്ചത് ?
അങ്ങേരത് വേണ്ട രീതിയിൽ 
ആക്കിവെക്കാതിരുന്നത് കൊണ്ടല്ലേ 
ഈ മാരണം ഓരോ വർഷവും 
തലവേദനയാകുന്നത് ?
ഇതൊക്കെ ഓരോ ഒത്തുകളികളല്ലേ ?
കുരങ്ങൻ അപ്പം പകുത്തതു പോലെ 
അവർ അപ്പം പകുത്തുകൊണ്ടേയിരിക്കുന്നു 



പിന്നെയൊരു സന്തോഷ വാർത്തയുണ്ട് 
ജനത്തിന് താൽപ്പര്യമുള്ള ഒരു വാർത്ത 
സവാള ഇപ്പോൾ കിലോ പത്തു രൂപാ മാത്രം