" എന്താണ് പ്രണയം ?"

അവൻ ദേവലാൽ 
എൻറെ പ്രണയം കവർന്നവൻ 
എന്നോട് ചോദിക്കുന്നു 
" എന്താണ് പ്രണയം ?"

ഞാൻ എന്നോടുതന്നെ ചോദിക്കുന്നു 
"എന്താണ് പ്രണയം ?"
വൈകുന്നേരം ചായ കുടിക്കാനിരിക്കുമ്പോൾ 
ലേഖാ സെബാസ്റ്റ്യാനോട് ഞാൻ ചോദിക്കുന്നു 
"എന്താണ് പ്രണയം ?"

"പരസ്പരമുളള ഇഷ്ടം 
ആണും പെണ്ണും തമ്മിലുള്ള ഇഷ്ടം 
അതാണ് പ്രണയം --"
ലേഖാ സെബാസ്റ്റ്യന് സംശയമില്ല 

(നിങ്ങൾക്കറിയാമല്ലോ , ഈ ഉത്തരം 
എനിക്ക് ദേവലാലിനോട് പറയാനാവില്ല !
"എനിക്ക് നിന്നോട് പ്രണയമാണ് !" 
ഇന്ന് രാവിലെയും ഞാൻ അവനോടു പറഞ്ഞതാണ് !!

വൈകിട്ട് കടപ്പുറത്തേക്ക് നടക്കുമ്പോൾ 
മനുവിനോട് ഞാൻ ചോദ്യം ആവർത്തിച്ചു 
( നിങ്ങളോർമ്മിക്കുന്നുണ്ടാവും , മനു 
എൻറെ പ്രണയം അറിഞ്ഞവനാണ് .
ഇപ്പോഴും അറിയുന്നവനാണ് .
അവൻ വിവാഹിതനായിട്ടും ഇപ്പോഴും 
അവൻ എന്നോടൊപ്പം ഉറങ്ങാറുണ്ട് )
മനു ഏറെ നേരം മൗനമായിരുന്നു 
അവൻ എന്തെല്ലാമാണ് ചിന്തിച്ചതെന്നെനിക്കറിയില്ല 
അവസാനം അവൻ പറഞ്ഞു :" രണ്ടുപേർ തമ്മിലുള്ള ഇഷ്ടം !!"

രാത്രിയിൽ ദേവലാലിൻറെ കൊഴുത്ത തുടകളും 
അവൻറെ വെളുത്തു തുടുത്ത ശരീരവും 
എന്നിൽ കാമാഗ്നിയുണർത്തിയപ്പോൾ 
ഞാനറിഞ്ഞു :" ഇണയോടുള്ള ദാഹമാണ് പ്രണയം !"

രാവിലെ ഒരു പുസ്തകവും ഒരു നോട്ടുബുക്കുമായി 
അവനെത്തി ; ദേവലാൽ -- എൻറെ പ്രണയഭാജനം 
സമസ്യാപൂരണം ഓർമ്മിപ്പിക്കും പോലെ 
അവൻ ചോദ്യം ആവർത്തിച്ചു :"എന്താണ് പ്രണയം ?"
"ഇണയോടുള്ള ദാഹമാണ് , പ്രണയം "--- ഞാൻ 
"ഇണയോടുള്ള ദാഹം പച്ചയായ കാമമാണ് "-- അവൻ 
(തേങ്ങാക്കൊല )
"രണ്ടുപേർ തമ്മിലുള്ള ഇഷ്ടമാണ് പ്രണയം "-- ഞാൻ 
"അത് പ്രേമം "-- അവൻ 
"പ്രേമവും പ്രണയവുമൊന്ന് തന്നെ "
"തണുപ്പിനോട് പ്രണയം -- എന്താ  അർഥം ?" , അവൻ 
ഏതോ ആധുനിക കവിയുടെ 
ഏതോ കവിതയിലെ പ്രയോഗം എടുത്തിട്ടു 
ഞാൻ ജയിച്ചു ! ഇഷ്ടം !! വെറും ഇഷ്ടം 
ഞാൻ പറഞ്ഞു "തണുപ്പ് ഇഷ്ടം ആണെന്ന് ! അല്ലാതെന്താ !"
അവൻ പൂവങ്കോഴിയെപ്പോലെ തലയുയർത്തി 
മുഖം കൂർപ്പിച്ചിരുന്നു 
"ഹേയ് , അങ്ങനൊന്നുമല്ല; നിങ്ങൾക്ക് മലയാളം അറീല്ല "

എനിക്ക് പെട്ടെന്ന് ശരിയുത്തരം കിട്ടി 
" നീയാ മലയാളം നിഘണ്ടു എടുത്ത് നോക്ക് !"
ഞാൻ പറഞ്ഞു 
(അല്ല എല്ലാ വാക്കുകളുടെയും അർഥം 
നിഘണ്ടുവിൽ എഴുതിവെച്ചിട്ടുണ്ടല്ലോ 
നമ്മളെന്തിനാ പാടുപെടുന്നത് ? )

കുറിപ്പ് : പ്രണയം എന്ന പദത്തിൻറെ അർത്ഥമറിയാത്തതിന് ശിക്ഷയായി ഒരാഴ്ച അവൻറെ ശരീരത്തിൽ സ്പർശിക്കുന്നത് അവൻ വിലക്കിയിരിക്കുകയാണ് . ഇത്തരം കവികളെ നമ്മൾക്ക് ആവശ്യമുണ്ടോ എന്ന് ചിന്തിക്കേണ്ട സമയം അതിക്രമിച്ചിരിക്കുന്നു